ភ្នំពេញ៖ សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា ថ្លែងថា រាជរដ្ឋាភិបាលនឹងបន្តផ្តល់អាទិ៍ភាព ក្នុងការជ្រើសរើស និងបណ្តុះបណ្តាលគ្រូបង្រៀន ដើម្បីបំពេញបន្ថែមនូវតម្រូវការគ្រូបង្រៀនប្រកបដោយគុណភាព។

សម្តេចតេជោថ្លែងដូចនេះក្នុងពិធីបិទសន្និបាតអប់រំ យុវជន និងកីឡា ថ្ងៃទី១២ ខែមេសា ឆ្នាំ២០២៣នេះ នៅវិទ្យាស្ថានជាតិបច្ចេកវិទ្យា។

សម្តេចតេជោលើកឡើងថា ការបន្តផ្តល់អាទិ៍ភាព ក្នុងការជ្រើសរើស និងបណ្តុះបណ្តាលគ្រូបង្រៀននេះក៏ដើម្បីការគៀងគរ និងផ្តល់ធនធានបន្ថែមទៀតសម្រាប់គាំទ្រដល់ការអភិវឌ្ឍន៍សមត្ថភាពគ្រូបង្រៀន ការអនុវត្ត ការកែទម្រង់សាលារៀន ការលើកកម្ពស់ ការអភិវឌ្ឍ។

សម្តេចបានបន្ថែមឱ្យដឹងទៀតថា ការបន្តផ្តល់អាទិ៍ភាពនេះក៏ជាការលើកកម្ពស់បំណិនសតវត្សទី២១ ដល់យុវជន ការអប់រំវិទ្យសាស្រ្ត និងបច្ចេកវិទ្យា ការជំរុញការអប់រំឌីជីថល ការកែទម្រង់សាលាគរុកោសល្យ និងការលើកកម្ពស់សុខភាពសិក្សា និងការបង្កើតមជ្ឈមណ្ឌលឧត្តមភាពនៅគ្រឹះស្ថានឧត្តមសិក្សាផងដែរ៕